CO2-lagring

Direktoratet følger også opp rettshavarane og ser til at regelverk og vilkår for dei tildelte løyva blir etterlevd. Andre viktige oppgåver er å formidle fakta og kunnskap om lagringspotensialet på norsk sokkel og foreslå korleis regelverket for CO₂-handtering kan utviklast.

Sikker lagring og stor kapasitet

Vi skal leggje til rette for sikker lagring av CO₂. Fangst og lagring av klimagassen CO₂ (carbon capture and storage, CCS) kan bidra til å redusere den globale oppvarminga. På norsk sokkel, djupt under havbotnen, er mogleg å lagre store mengder CO₂ på ein sikker måte.

Store geologiske formasjonar gir eigna lagringsvilkår og har eigenskapar som hindrar at CO₂ bevegar seg oppover stein- og sandlaga mot havbotnen. Sokkeldirektoratet har laga eit atlas som viser at lagringskapasiteten er på meir enn 80 milliardar tonn CO₂. Dette svarer til rundt 1600 år med norske CO₂ -utslepp på dagens nivå.

Regelverket

Forskrift om utnytting av undersjøiske reservoar på kontinentalsokkelen til lagring av CO2 og om transport av CO2 på kontinentalsokkelen gir heimel for CO2-lagring. Formålet er å leggje til rette for samfunnsøkonomisk lønnsam lagring av CO2.

Forskrifta fastset vilkår og rammer for mellom anna tildeling av undersøkings-, leite- og utnyttingsløyve, der prinsippet er statleg styring av og kontroll med lagringsressursane gjennom eit konsesjonssystem.

Anna relevant regelverk: Forskrift om dokumentasjon ved lagring av CO2 på sokkelen

Open dør-politikk

Søknader etter lagringsforskrifta blir behandla etter ein open dør-politikk. Det betyr at aktørar, som ønskjer eit løyve, kan søkje så fort dei meiner dei har arbeidd fram eit tilstrekkeleg godt søknadsgrunnlag.

Innkomne søknader blir fortløpande vurderte. Dersom søknadene har tilstrekkeleg kvalitet, blir det området kunngjort staten vurderer som aktuelt å kunne tildele med ein passande søknadsfrist.

Meir om CO2-lagring

Les meir om fangst, transport og lagring av CO₂ på norskpetroleum.no

Utforsk og lær meir om CO2-lagring (nettsida vart laga i samband med ONS 2024, berre på engelsk)